د ملي امنیت پخوانی رییس او ولسمشرۍ ټاګنو ته نوماند رحمت الله نبیل وايي چې طالبان پر ټاکنو او دموکراسي باور نه‎لري او غواړي چې ټول واک ترلاسه کړي.

ښاغلي نبیل چې نن له غرمې مخکې (یکشنبې د غبرګولي په ۱۲مه) کابل کې يوې غونډه کې وینا کوله، سیاستوالو او افغان حکومت ته ګواښ وکړ چې د طالبانو پر خبرو باید دوکه نه شي.
هغه زیاته کړه:«طالب ټول واک غواړي چې په افغانستان کې اسلامي امارت ولري او وروسته سست عنصران د تکنو ګرات په نامه حکومت کې شامل کړي؛ هغوی نه ټاکنې غواړي او نه هم دموکراسي. ځان باید دوکه نه کړو! یوازینۍ حل لار د شخصي ګټو په پام کې نیولو پرته یوه اجماع ده.»
هغه وویل هغه طریقه چې له طالبانو سره اوس د سیاستوالو او د زلمي خلیلزاد له خوا په مخ وړل کېږي، تېروتنه ده. د ښاغلي نبیل په اند، د طالبانو استازي په هغو غونډو کې چې په هغه کې د بهرنیو هېوادونو استازي هم وي، بلل کېږي، طالبانو ته د مشروعیت ورکول او د دښمن د تعریف تحریف دی. 
ښاغلي نبیل زیاته کړه:«هېڅوک د سولې مخالف نه دي خو باید د سولې او معاملې ترمنځ توپیر وکړو؛ معامله هېواد د کړکېچ په لور بیایي. د زلمي خلیلزاد او د مسکو غونډې د ګډونوال په نیت کې هېڅ شک نه وینو، خو طریقه یې ناسمه ده. ځکه چې له دغو بحثونو د افغانستان خلک زیان ویني او ګټه یې نورو هېوادونو او طالبانو ته رسېږي.» 
ښاغلي نبیل ګواښ وکړ بهرنۍ طرحه که هغه د سولې لپاره وي او د لنډمهاله حکومت د رامنځته کېدو لپاره په افغانستان کې د تطبیق وړ نه ده او منفي پایلې لري.
د ملي امنیت پخوانی رییس همدارنګه ګواښ وکړ چې روان کال کې به هېواد کې جګړه زور واخلي.
ولسمشرۍ ټاکنو ته دغه نوماند، د خپلو څرګندونو په بله برخه کې د حکومت د کار په اړه خبرې کوي او وايي چې د دغه حکومت کار د غبرګولي له لومړۍ نېټې وروسته د قانون بر خلاف دی او د ولسمشرۍ ټاګنو د نوماندانو شورا په دې اړه به وروستۍ پرېکړه وکړي.
هغه زیاته کړه چې د ملي یووالي حکومت مشران حق نه‎لري چې له دې وروسته د حکومتي چارواکو په ګومارنې او عزل کې لاسوهنه وکړي، بهرني او داخلي سفرونه ترسره کړي، تقنیني فرمانونه صادر کړي او یا هم د حکومت له دریځ او امکاناتو څخه په ټاکنیزو سیالیو کې کار واخلي.
له دې ټولو سره، هغه زیاته کړه چې سره له اوسه، ولسمشرۍ ټاکنو ته یوه نوماند د حکومت له لګښت څخه د ټاکنیزو سیالیو لپاره کابو څلوېښت دفترونه پرانیستې دي