وسله والو په غزني کې یو قومي مشر وژلی او یو خبریال یې ټپي کړی

د غزني چارواکي خبر ورکوي چې نن غرمه د غزني په مرکز کې یو قومي مشر معلم عبدلرازق وژل شوی او تر څنګ یې د احمد شاه احمدي په نوم د ملي ټلویزیون یو تصویر اخیستونکی ټپي شوی دی.
د ولایت ویاند محمد عارف نوري د جمعې په ورځ په دې اړه ازادي راډیو ته وویل، معلم عبدالررازق او احمدشاه احمدي د قلعه سبز په سیمه کې د برښنا شرکت ته څېرمه په یوه دوکان کې ناست و چې غرمه دولس بجې ورباندې ناڅرګندو کسانو د بې غږه وسلې په وسیله برید کړی.
تر اوسه پورې کومې وسله والې ډلې د دغه برید پړه پر غاړه نه ده اخیستې.
معلم عبدالرازق له غزني ولایته ولسي جرګې ته د راتلونکو ټاکنو احتمالي کاندید و.