د بلخ ځينې اوسېدونکي وايي چې په دغه ولایت کې د مخابراتي شبکو د خدماتو له بندېدو سره هغوی له ګڼو ستونزو سره مخ شوي دي.
بلخ کې د مخابراتي شبکو د خدماتو بندېدو خلک له ستونزو سره مخ کړي
طلوع نیوز , 5 اسد 1398 ساعت 17:46
د بلخ ځينې اوسېدونکي وايي چې په دغه ولایت کې د مخابراتي شبکو د خدماتو له بندېدو سره هغوی له ګڼو ستونزو سره مخ شوي دي.
اته ورځې کېږي چې په بلخ کې د خصوصي مخابراتي شبکو خدمتونه بند شوي دي او یوازې یوه دولتي شبکه «سلام» په دغه ولایت کې مخابراتي خدمتونه وړاندې کوي.
د بلخ یوه اوسېدونکې زلیخا وايي درې ورځې کېږي چې د سلام سیم کارټ د اخستو لپاره مزار شریف کې یو پلورنځي ته راځي. وايي، یو زوی یې سرتېری او بل زوی یې بیا له هېواد د باندې دنده لري، خو نږدې یوه اوونۍ کېږي چې د برخلیک په اړه یې خبر نه لري.
د مزار شریف اوسېدونکې زلیخا زیاته کړه:«یو زوی مې عسکر دی، په سنګر کې دی او بل زوی مې په ایران کې دی، دلته راغلې یم څو سیم کارټ واخلم او د هغوی له احواله خبره شم ځکه چې اختر نږدې دی. خو سیمکارټ نه راکوي له ډېر تګ راتګه ستومانه شوې یم.»
محمد نظر د فاریاب اوسېدونکی دی، خو مزار شریف کې دنده لري. دی وايي، له هغې ورځې چې دې ولایت د مخابراتي شبکو فعالیت بند شوی دی، د خپلې کورنۍ په اړه مالومات نه لري.
نږدې یوه اوونۍ کېږي چې مزار شریف کې د حکومت له خوا د مخابراتي شرکتونو فعالیت بند شوی دی. چارواکي وايي، د شبکو فعالیت یې ځکه ور بند کړی دی چې شبکې له طالبانو سره لار لري. اوس د مزار شریف اوسېدونکي د سلام سیم کارټ د اخستو لپاره د دې شرکت څانګو ته ورځي.
د خصوصي شبکو فعالیتونه هغه مهال مزار شریف کې د حکومت لهخوا بند کړل شول چې دې شرکتونو شپه مهال د ګواښونو له کبله خپلې چارې ودرولې.
د مطلب کود: 189048