تګاب کې د یو توغندي لګېدو ۴ ملکي وګړي وژلي

د پروان د امنیه قوماندانۍ ویاند شایق شورش د ملکي وګړو مړینه تأییدوي او وايي په دې اړه څېړنې پیل شوي چې دا توغندی د کوم لوري له‌خوا توغول شوی دی.
عیني شاهدانو په پروان ولایت کې د ازادي راډیو خبریال ته وویل، د تګاب ولسوالۍ په جاروخېل سیمه کې د ملکي وګړو د استوګنې پر یوه کور د توغندي د را پرېوتو په پېښه کې ۴ کسان وژل شوي چې یوه ښځه او ۳ ماشومان دي.
د سیمې اوسېدونکي وايي چې دا توغندی په سیمه کې دېره امنیتي ځواکونو توغولی او دوی د قربانیانو جسدونه د اعتراض په توګه د سړک پر سر ایښي او مظاهرې ته راوتلي دي.
دوی همداراز تور لګوي چې امنیتي ځواکونو پر مظاهره‌چیانو ډزې کړي او اته تنه‌یې ټپیان کړي دي.
امنیتي ځواکونو تر اوسه د دغو ادعاوو په اړه څه نه‌دي ویلي.