کد QR مطلبدریافت صفحه با کد QR

طالبان: له امریکا سره خبرې به یو دوو ورځو کې بشپړه شي

د صدای افغان خبری آژانس(آوا) , 2 سنبله 1398 ساعت 11:31

په قطر کې د طالبانو د سیاسي دفتر ویاند سهیل شاهین وايي، چې د طالبانو د استازو او امریکایي چارواکو ترمنځ د سولې د خبرو په نهم پړاو کې پر یو لړ مسئلو خبرې شوي او تمه ده چې په دوو ورځو کې به د دواړو خواو ترمنځ په پاتې مسئلو هم موافقه تر لاسه شي.



سهیل شاهین تېره شپه د «اګست پر۲۳مه»په دوحه کې د امریکا غږ خبریال ایوب خاورین ته ویلي، چې تمه ده، روانې خبرې به په یو دوو ورځو کې پای ته ورسېږي.
سهیل شاهین ویلي:"اکثره مسایلو او عملي میکانیزم باندې موافقه شوې، یوازې یو څو مسایل لاپاتې دي."
هغه وویل:"خبرې به په یو دوو ورځو کې بشپړې شي."
تېره شپه د دواړو غاړو ترمنځ خبرې په کوچنیو کمېټو کې په بېلابېلو ځایونو کې شوي او د دواړو غاړو استازو چې معمولاً په «دیپلوماتیک کلوپ» سره لیده کاته کوي، تېره شپه عمومي غونډه نه لرله.
دا د افغان سولې په اړه د امریکايي او طالب استازو نهم پړاو مذاکرات دي چې د پنجشنبې په ورځ پیل شول.
په ورته وخت کې سرچینو امریکا غږ ته ویلي، چې ممکن د افغانستان د پخلاینې لپاره د امریکا د بهرنیو چارو وزارت ځانګړی استازی زلمی خلیلزاد په یو دوو ورځو کې کابل ته سفر وکړي.
ښاغلي خلیلزاد د جمعې په ورځ په قطر کې د افغانستان له سفیر حکیم دلیلي سره هم لیده کاته کړي دي.
خلیلزاد له طالبانو سره د نهم پړاو د خبرو د پیل نه وړاندې پر خپل ټوېټر پاڼه لیکلي و چې د دغه پړاو په پیل کې لومړی قطر ته ځي او بیا به له هغه ځایه افغانستان ته ولاړ شي.
 


د مطلب کود: 190439

دمطلب پته :
https://www.avapress.com/ps/news/190439/طالبان-له-امریکا-سره-خبرې-یو-دوو-ورځو-کې-بشپړه-شي

آوا
  https://www.avapress.com