د افغانستان د کورنيو چارو وزارت وايي، د کابل ښار د نهمې امنيتي حوزې اړوند د ګرين ويلج په نوم کمپ باندې د تيري شپې چاودنه کې 16 تنه وژل شوي او 119 تنه نور ټپيان شوي دي.

دغه وزارت نن سې شنبه په يوه اعلاميه کې ويلي چې په وژل شوو او ټپي شوو کسانو کې ملکي وګړي او د دغه کمپ کار کوونکي شامل دي.
بيان زياتوي چې دغه چاودنه د تراکتور په مرسته تر سره شوې ده.
د کورنيو چارو وزارت ويلي چې د چاودنې پر مهال په سيمه کې يو تېل پمپ هم اوراخستى او تر څنګ يې د ملکي وګړو ګڼ کورونه هم تخريب شوي دي.
دغه وزارت وايي افغان ځواکونو هغه پنځه طالبان هم وژلي چې تر چاودنې وروسته يې پر دغه کمپ د برير پلان درلود.
بيان وايي د پاک سازې عمليات نن سهار پنځه بجې پاى ته ورسېدل او 400 بهرنيان خوندي ځاى ته انتقال شوي دي.