ولسمشر غني: افغانستان له وارداتي هېواده په صادراتي بدل شوی

21 سنبله 1398 ساعت 9:50

افغان ولسمشر محمد اشرف غني وايي، افغانستان له وارداتي هېواده په صادراتي بدل شوی دی.



ښاغلي غني دغه څرګندونې پرون د حیرتان بندر له لارې چین ته د افغانستان د لومړنۍ سوداګریزې محمولې د لېږد د نماځنې په مراسمو کې وکړې.
په دې اړه د ارګ په خبرپاڼه کې راغلي چې ښاغلي غني دا یو بنسټیز بدلون یاد کړ او زیاته یې کړه چې دولت د خصوصي سکټور له همکارۍ پرته دا کار نشو کولی.
خو په خبرپاڼه کې دا هم راغلي چې ولسمشر وویل، د افغانستان ګمرکونه اصلاحاتو ته اړتیا لري، زمونږ عواید او مصارف باید بیلانس ولري، مونږ هغه هېواد وو چې ټول لګښت مو له بهرنیو مرستو تامینېده، په دې ځای کې د لیدلوري تغییر ته اړتیا ده.
خبرپاڼه وايي چې ولسمشر په ټینګار سره خصوصي سکټور، کروندګر او صنعت کاران د افغانستان د پراختیا اتلان یاد کړل.
ښاغلی غني دغه څرګندونې داسې مهال کوي چې د افغانستان د سوداګرۍ او صنایعو خونې په وینا، د افغانستان د هوايي دهلېزونو د پرانیستې له پیله تر اوسه ۷۸۳ پروازونه شوي چې په کې ۸۴۴۵ ټنه کرنیز توکي بېلابېلو هېوادونو ته صادر شوي دي.


د مطلب کود: 191445

دمطلب پته: https://www.avapress.com/ps/news/191445/ولسمشر-غني-افغانستان-له-وارداتي-هېواده-په-صادراتي-بدل-شوی

آوا
  https://www.avapress.com