په کابل کې د ملګروملتونو مرستندوی دفتر یوناما تېره شپه ناوخته په یوه خبرپاڼه کې د خپلو کارکوونکو هویتونه نه دي ښودلي خو پر افغان حکومت یې غږ کړی چې د برید عاملان عدالت ته راکاږي.
د افغانستان د ملي امنیت شورا او په کابل کې د امریکا سفارت هم دا حمله غندلې.
د کورنیو چارو وزارت پرون تائید کړه چې یو بهرنی وګړی پرون ماښام د کابل په مکروریانو کې د ملګروملتونو پر موټر د لاسي بم په برید کې ووژل شو.
د کورنیو چارو وزارت مرستیال ویاندې مروې امیني آزادۍ راډیو ته وویل په برید کې ۵ ملکي وګړي هم ټپیان شوي.
هغې زیاته کړه: "د ملګروملتونو پر یو موټر د کابل د دریم مکروریان د نهمې ناحیې اړوند سیمه کې د لاسي بم برید شوی، په پېښه کې یو بهرنی مړ شوی او پنځه ملکي کسان ټپیان شوي، په ملکيانو کې دوه تنه د ملګروملتونو د دفتر افغان کارکوونکي دي."
د دې برید مسوولیت تراوسه کومې ډلې نه دی منلی خو په افغانستان کې ډېری وسله وال بریدونه طالبان او د اسلامي دولت ډله- داعش کوي.