د ټاکنیزو شکایتونو د ثبت د مودې له پای ته رسېدو سره سم د ولسمشرۍ نوماند رحمت الله نبیل وايي، د میزان د ۶مې ټاکنې له درغلیو ډکې وې او باید چې په دغو ټاکنو کې د تقلب کوونکو لیست خپور شي.
ښاغلي نبیل د ټاکنیزو شکایتونو پر کمېسیون غږ کړی چې رایې دې په شفاف ډول وڅېړي او که داسې وشي، نو ټاکنې به دویم پړاو ته ولاړې شي.
نوموړی وايي، د افغانستان ولسمشریزې ټاکنې د سولې د مذاکراتو تر اثر لاندې دي او هره نتیجه چې په سوله کې راوځي همغسې به کېږي.
ښاغلي نبیل ویلي په ولسمشریزو ټاکنو کې د خلکو د ګډون میزان ټیټ و او دا د افغانستان د ولسواکۍ د راتلونکې لپاره د خطر زنګ وي.
ښاغلی نبیل د ولسمشریزو ټاکنو معترض نوماند دی چې لومړنۍ اعلان شوې پایلې نه مني، په داسې حال کې چې پخپله یې شاوخوا ۳۳ زره رایې ګټلې دي.