د عراق لومړي وزیر عادل عبدالمهدي له امریکا غوښتي چې له هېواده یې د امریکايي پوځیانو خوندي وتلو میکانیزم لپاره خبرې ورسره وکړي.
د ښاغلي مهدي پر رسمي فېسبوکپاڼه یوه خپره شوې اعلامیه کې ویل شوي، چې نوموړي د جمعې پر ورځ د امریکا بهرنیو چارو له وزیر مایک پومپیو سره ټیلیفوني خبرو کې دا غوښتنه کړې.
د ښاغلي مهدي دفتر ویلي، لومړی وزیر د عراق خپلواکي او ځمکنۍ بشپړتیا ضد هر اقدام ردوي. په دې اقداماتو کې د امریکا لخوا د ایراني جنرال قاسم سلیماني وژنه او د عراق په خاوره کې پر دوو امریکايي اډو د ایران توغندیز بریدونه شامل دي.