خوښ ديک ۰

"امریکا له طالبانو غوښتي چې له ایران سره خپلې اړیکې پای ته ورسوي"

د حزب اسلامي مشر ګلبدین حکمتیار په دې باور دی چې واشنګټن او تهران ترمنځ د اختلافاتو له زیاتوالي وروسته امریکا له طالبانو غوښتي چې له ایران سره خپلې اړیکې پرې کړي او همداراز په افغانستان کې د ځينو امریکايي پوځیانو له پاتې کېدو سره موافقه وکړي.
"امریکا له طالبانو غوښتي چې له ایران سره خپلې اړیکې پای ته ورسوي"

ښاغلی حکمتیار وايي چې امریکا دا دوه اصله له طالبانو سره د سولې هوکړه لیک د لاسلیک لپاره وار له مخې شرطونو په توګه مطرح کړي او نوموړی دا شرطونه د سولې په وړاندې جدي خنډ ګڼي.
د حزب اسلامي مشر ګلبدین حکمتیار په دې اړه وویل:«اوس د امریکا له خوا د نویو وار له مخې شرطونو په توګه وړاندې شوي چې طالبان دې له ایران سره خپلې اړیکې پرې کړي او حتا ویل کېږي چې له طالبانو یې غوښتي چې د هغوی د ځينو سرتېرو د حضور په اړه هم هوکړه وکړي.»
طالبانو تراوسه په دې اړه رسمي غبرګون نه دی ښودلی.
د افغانستان د سولې بهیر د ملي یووالي حکومت دوې اصلي برخې د اوربند په اړه د نظریاتو له توپير سره مخامخ کړې دي.
په داسې حال کې چې ارګ اوربند د افغانانو ترمنځ د خبرو د پیلولو لپاره مهم شرط بولي خو اجراییه ریاست د خبرو د پیلولو لپاره د طالبانو لخوا د تاوتریخوالي کمښت بسندویه بولي.
د اجراییه ریاست ویاند مجیب رحیمي په دې اړه وايي:«که چېرې د تاوتریخوالي کموالی د هغو معیارونو او میکانیزم پر بنسټ وي چې د امریکا او د افغانستان د حکومت لپاره د منلو وړ وي زموږ لپاره هم د منلو دی او اوربند کولای د افغانانو ترمنځ خبرو اترو کې مطرح شي.»
له دې سره سره د افغانانو ترمنځ د خبرو د پيلولو لپاره د افغان حکومت او طالب ډلې نرمښت او نعطاف منل ډېر مهم بلل کېږي.
د افغانستان د ستراتېژيکو څېړنو د انسټېټیوټ څېړونکی حسن احساني وویل:«اړتیا ده چې نرمښت وښودل شي او دا نرمښت باید د طالبانو له لوري وښودل شي، طالبان باید د افغانستان واقعیتونه ومني.»
له بلخوا د سپينې ماڼۍ د ملي امنیت سلاکار په امریکا کې له آکسیوس خبري ویب پاڼې سره په مرکه کې په روان کال کې د امریکا او طالبانو ترمنځ د موافقې د وروستي کېدو د احتمال خبر ورکوي، ځکه د هغه په وینا په جګړه کې د افغان دولتي ځواکونو توانمني زیاته شوې ده.
د سپینې ماڼۍ د ملي امنیت سلاکار رابرټ اوبراین په دې اړه ویلي:«ښايي ټرمپ سږ کال له طالبانو سره موافقه لاسلیک کړي خو آن که ونه توانېږي چې هوکړې ته ورسېږي، ولسمشر تراوسه هم چمتو دی چې په افغانستان کې د خپلو پوځیانو شمېر کم کړي.»
طالبان له څه باندې یوې میاشتې راهیسې د تاوتریخوالي د کمښت د څرنګوالي په اړه سلامشوره کوي او په قطر کې د امریکا استازي په دې اړه د طالبانو د ځواب په تمه دي.
ویل کېږي چې د تاوتریخوالي د کمښت په هکله د طالبانو د دریځ له روښانه کېدو وروسته تمه کېږي چې د افغانستان د سولې لپاره د امریکا ځانګړی استازی زلمی خلیلزاد کابل ته راشي او د ملي یووالي حکومت له مشرانو سره وګوري.
 
سرچينه : د صدای افغان خبری آژانس(آوا)
سی شنبه ۲۴ جدی ۱۳۹۸ ساعت ۱۹:۴۷
د مطلب کود: 200709 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *