کد QR مطلبدریافت صفحه با کد QR

د افغان ټاکنو "وروستۍ پایلې"، خلک د هېلو او اندېښنو ترمنځ

1 حوت 1398 ساعت 18:38

د افغانستان د ولسمشریزو ټاکنو د وروستیو پایلو اعلان د یو شمېر عامو افغانانو د هرکلي ترڅنګ د ځینو د اندېښنې سبب هم ګرځېدلي. ددغو پایلو تر اعلان وروسته د ثبات او همپالنې ډلې مشر عبدالله عبدالله د خپلې بریا اعلان کړی.



د افغانستان د ولسمشریزو ټاکنو د وروستیو پایلو په اړه د غبرګونونو په دوام پخواني ولسمشر حامد کرزي ویلي، چې تېرې ټاکنې په هېواد کې د بحران او بې اتفاقی لامل شوي. د ښاغلي کرزي له دفتره نن چهارشنبې (د ۲۰۲۰ میلادي کال د فبرورۍ ۱۹مه) خپرې شوې ویناپاڼې، د نوموړي له قوله لیکلي: «هغه بهیر چې د ټاکنو ترنامه لاندې زمونږ پر خلکو تحمیل شو، یو غیر ملي بهیر ؤ چې د اصولو او د ولسواکۍ له ارزښتونو سره په ټکر کې واقع شو، په ټاکنو کې د خلکو نه ګډون ددغه واقعیت ښه څرګندونه کوي.»
پخواني ولسمشر زیاته کړې چې په اوسني وضعیت کې د سولې د ټینګښت لپاره افغانان ترهرڅه ډیر یووالي ته اړتیا لري.
د تېرو ولسمشریزو ټاکنو نوماند رحمت الله نبیل چې وروستیو پایلو کې څلورم مخکښ نوماند دی په خپل غبرګون کې "وروستۍ پایلې" د ولسواکۍ مرګ بللي. ښاغلي نبیل کابل کې خبریالانو ته ان دا هم وویل چې دغو پایلو د هېواد وضعیت تردې بریده کړکیچن کړ، چې په ځینو ولایتونو کې له ولسواکۍ او ټول شموله حکومتونو څخه د دفاع ترنامه لاندې وسلې هم وېشل شوي.
 هغه وویل: «د درغلیو په پایله کې راوتلی حکومت د منلو وړ نه دی، خو غبرګونی حکومت هم د حل لاره نه ده.»
دا څرګندونې داسې مهال دي چې د ثبات او همپالنې ټاکنیزې ډلې مشر عبدالله عبدالله د ټاکنو د وروستیو پایلو تر اعلان څو ساته وروسته ځان د ټاکنو ګټونکی اعلان کړ.د ولسمشر لومړي مرستیال جنرال عبدالرشید دوستم نن چهارشنبه په جوزجان کې خپلو سلهاوو پلویانو ته د وینا پرمهال د عبدالله عبدالله په مشرۍ د «ټول شموله حکومت» جوړولو څخه ملاتړ وکړ.
دوستم زیاته کړه: «ټول ولایتونه په ځانګړې توګه شمالي ولایتونه چمتووالی ونیسی چې خپل والیان وټاکی... حق اخیستل کیږي، نه دا چې ورکول کیږي.»
 


د مطلب کود: 203957

دمطلب پته :
https://www.avapress.com/ps/news/203957/د-افغان-ټاکنو-وروستۍ-پایلې-خلک-هېلو-او-اندېښنو-ترمنځ

آوا
  https://www.avapress.com