غني: د تاوتریخوالي کمښت اوونۍ کې وضعیت له نږدې او په دقت څارل کېږي

د بېګا شپې له دولس بجو په ټول افغانستان کې د تاوتریخوالي د کمېدو هوکړه عملي کېږي.
د هوکړې پر اساس به له ننه چې د فبرورۍ ۲۲مه ده، په ټول افغانستان کې وسله وال طالبان د افغانستان پر امنیتي ځواکونو او بهرنیو قواوو بریدونه نه کوي او پر وسله والو طالبانو به هم بریدونه نه کېږي.
د افغانستان ولسمشر محمد اشرف غني ویلي چې په یوه اونۍ کې به چې طالبانو د تاوتریخوالي کمولو هوکړه کړې، له احتیاطه ډک عمل کېږي او د افغانستان امنیتي ځواکونه به وضعیت له نږدې او په دقت څاري.
محمد اشرف غني په بېګاني وینا کې چې له ملي ټلوېزیونه خپرېده، وویل چې دافغانانو غوښتنه دایمي سوله، اوربند او د مذاکرو پېل دی خو دا چې طالبانو د تاوتریخوالي د کمولو هوکړه کړې، هم د اوربند او پایه دارې سولې پر خوا یو ګام دی.