په داسې حال کې چې نن شنبه له طالبانو سره د امریکا د سولې هوکړه لاسلیکېږي، د امریکا ولسمشر ډونلډ ټرمپ پر افغانانو غږ کړی چې د سولې له فرصته ګټه واخلي.
په پام کې ده چې د دغه تړون لاسلیکېدو لپاره د امریکا د بهرنیو چارو وزیر مایک پمپیو قطر ته ولاړ شي.
دا تړون به له افغانستانه د زرګونو امریکايي ځواکونو ایستلو ته زمینه برابره کړي. یاد تړون په افغانستان کې د اورکم له یوې اونۍ وروسته له طالبانو سره لاسلیکېږي.

دغه تړون په افغانستان کې د ۱۸ کلنې جګړې ختمېدو لپاره د خلکو هیلې ډېرې کړې دي.
ټرمپ د جمعې په ورځ په یوه خبرپاڼه کې ویلي: "د سولې هوکړه به د امريکا د بهرنيو چارو وزير مايک پمپيو په حضور کې نن شنبه قطر کې لاسليک شي."