کندهار کي د افغان ځواکونو ملي ورځ ولمانځل سول

په کندهار کي د حوت ۹مه د امنیتي او دفاعي ځواکونو ملي ورځ د ولسونو په پراخ ګډون او شاندارو مراسمو ولمانځل سوه
د شنبې په ورځ په ۲۰۵ اتل قول اردو کي کندهار والي حیات الله حیات، د نظامي شورا ټولو لوړ رتبه مسؤلینو، په جنوب کي د قاطع ملاتړ ماموریت مشاورینو، د ولایتي شورا رئیس حاجي سیدجان خاکریزوال، علماوو شورا او ښځو چارو رئیسانو، د ګڼ شمېر سکټوري ادارو مسؤلینو، د ټولني یو شمیر فعاله مېرمنو، مدني فعالانو، کوچنیانو، علماوو او د ټولني د بېلابېلو اقشارو څخه راغلو سلهاو ولسونو د حوت ۹مه د ملي، امنیتي او دفاعي ځواکونو ملي ورځ په جوش او ولولو ولمانځل.
په مراسمو کي د ۲۰۵ اتل قول اردو قوماندان برید جنرال میراسدالله کوهستاني وویل، ملي، امنیتي او دفاعي ځواکونو تر بل هر وخت په بې‌ساري ډول د ولسونو ملاتړ ترلاسه کړی او سرتېري به په هر ډول سختو شرایطو کي د ولسونو د سر او مال ساتنه کوي.
وروسته کندهار والي حیات الله حیات وویل، ملي، امنیتي او دفاعي ځواکونه د افغانستان د سپېڅلې خاروي، د ولسونو د سر او مال او د هېواد د لوېشت لوېشت خاوری څخه د دفاع او ساتنی مسؤلیت لري او په همدې ویاړ یې ټولو سرښندو او اتلو ځواکونو ته مبارکي وړاندې کړه.
کندهار والي د تاوتریخوالي کمښت اوونۍ ته په اشارې وویل، یادي اوونۍ څخه د هرکلي په موخه هره ورځ د قرانکریم ختمونه سوي او په هېواد کي د تل‌پاتي سولي لپاره هره ورځ په بېلابېلو ولسوالیو کي د یوه محراب مسجد ډبره اېښودل سوې ده.