د کمیتي د جوړیدو پر مهال کندهاروالي حیات الله حیات وویل، د جمهوررئيس محمد اشرف غني په هدايت يې نن یاد اقدام ترسره کړ، تر څو د بیړنیو حالاتو پر مهال د ښار او ولسوالیو په کچه عاجلو پيښو ته بشپړ چمتووالي موجود وي او په خبره يې دا کمیټه باید سبا ته د ښار او ولسوالیو په کچه د بیړنیو حالاتو لپاره واضح تګلاره او پلان جوړ او د ولایت مقام سره يې شریک کړي، تر څو د شته امکاناتو له مخي بیړنیو حالاتو ته خپل چمتوالي ولرو.

کندهاروالي زیاته کړه، کرونا ویروس سره هم مهاله د بې کاري کچه هم لوړیږي، چي په یاده برخه کي هم باید تدابیر موجود وي، ترڅو د اړمنو کسانو سره پر وخت مرستي ترسره سي او په یاده برخه کي یې کمیټې ته دنده وسپارل، چي یاد پلان باید د دریو میاشتنو لپاره ډیزاین او جوړ سي.

وروسته په غونډه کي یو شمیر سکتوري رئیسانو خپل د شته امکاناتو اړوند معلومات شریک کړل او په ځینو برخو کي یې خپل نظریات وړاندي کړل او د غونډي په وروستیو کي د ګډ کار په کولو او ښې همږغۍ له مخي چارو ته پر رسیدو ټینګار وسو.