کد QR مطلبدریافت صفحه با کد QR

د افغانستان حکومت د طالبانو سل بندیان خوشې کړل

21 حمل 1399 ساعت 10:58

د افغانستان حکومت د طالبانو ۱۰۰ تنه بندیان ددې سوګند نه وروسته چې هېڅکله به بېرته د جګړې ډګر ته نه ورګرځي، خوشې کرل.


د افغانستان د ملي امنیت شورا ویلي چې دغه طالب زندانیان د هغوی روغتیایي وضعیت، عمر او د مجازاتو د پاتې مودې ته په کتو، د سولې د هلو ځلو او د کرونا د مهارولو د هڅې د برخې په توګه خوشې شوي دي.
افغان حکومت همداشان ویلي چې دغه بندیان د افغانستان د جمهور رئیس محمد اشرف غني د ۱۳۹۸ کال د کب د ۲۰مې نېټې د فرمان له مخې خوشې شوي دي.
دا ۱۰۰ زندانيان په هغه اوږد لیست کې دي چې د طالبانو فني ټیم د افغانستان اسلامي جمهوریت له فني ټیم سره، کابل کې د خبرو اترو په لړ کې شریک کړی و او بحثونه یې پرې کړې وو.
افغان حکومت ویلي دا زندانیان د ملي امنیت عمومي ریاست او لویې څارنوالۍ له لورې بایومتریک شوي او سوګند یې کړی چې هېڅکله به بېرته د جګړې ډګر ته نه ورګرځي. افغان حکومت دغه ډول ډاډ د طالبانو ډلي له رهبرۍ څخه په دوحه کې هم ترلاسه کړی دی.
ځینو سرچینو دمخه د افغانستان ملي راډیو تلویزیون ته ویلي وو چې جمهور رئیس محمد اشرف غني د بګرام نه د طالبانو د بندیانو خوشې کولو فرمان لاسلیک کړی چې د سولې د پروسې سره مرسته وشي.
د افغانستان د ملي امنیت د شورا ویاند جاوید فیصل اې اف پي خبري اژانس ته ویلي وو چې د افغانستان حکومت د سولې پروسې د پرمختګ لپاره دا اقدام کوي.
د افغانستان د حکومت او طالبانو تر منځ د بندیانو د خوشې کولو پروسه د پنځلسو طالب قوماندانو د نه خوشې کولو له وجې ځنډلې ده. طالبان وایي دا قوماندان کولی شي د نورو خوشې شویو کسانو په پیژندګلوۍ کې مرسته وکړي خو حکومت وایي دغه قوماندان په ځینو غټو بریدونو کې لاس لري او اوس یې نه خوشې کوي.
د ملي امنیت د شورا ویاند جاوید فیصل هم ویلي چې پدې سلو کسانو کې چې ټاکل شوې نن خوشې شي، دا پنځلس قوماندانان ندي شامل. طالبانو تر اوسه پدې هکله تبصره نده کړې.


د مطلب کود: 207323

دمطلب پته :
https://www.avapress.com/ps/news/207323/د-افغانستان-حکومت-طالبانو-سل-بندیان-خوشې-کړل

آوا
  https://www.avapress.com