خوښ ديک ۰

ازبکستان پر افغانستان د برېښنا پرې کولو ګواښ کړی

د ازبکستان وارداتي برېښنا پیسو پر وخت نه ورکولو له امله یاد هېواد په افغانستان د برېښنا بندولو ګواښ کړی دی. د افغانستان د برېښنا شرکت رئیس امان الله غالب وايي: د کرونا وېرس د ګرځبندیز پر مهال په یو شمېر وګړو او آن دولتي ادارو پورونه تر وروستۍ کچې لوړ شوي، چې له امله یې دوی له سختو اقتصادي ستونزو سره مخ دي.

   غالب ددفاع او کورنیو چارو وزارت په ګډون یو شمېر دولتي ارګانونه او صنعتي شرکتونه د پورونو په نه اداء کولو تورنوي، چې زیان یې په ټوله کې افغانستان ته رسیږي.
   دا په داسې حال کې ده، چې څو ورځې وړاندې د افغانستان د برېښنا شرکت په ځينو ځایونو کې د برېښنا قطع کولو ګواښ کړی و.
   بل لور ته د مالیې وزارت وايي: ډیر ژر به د برېښنا د پورونو پرې کولو له پاره برېښنا شرکت ته مالي سرچینې پیدا او د هغوی په اختیار کې ورکړي.
   د یاد وزارت ویاند شمروز خان مسجدي رسنیو ته وویل: له ګاونډیو هېوادونو سره به خبرې وشي، چې د مالي مدرک تر پیدا کولو پورې د پییسو ورکولو ځنډ ورسره ومني.
   ویل کیږي، چې د برېښنا شرکت ازبکستان ته د برېښنا په بدل کې دوه میلیارده ډالر ورکوي. دغه برېښنا چې د کابل په ګډون ۱۰ ولایتونو کې کارول کیږي، اوس یې یوازې ۵ میلیارده افغانۍ دولت او ۸۰۰ میلیونه خصوصي سکتور قرضدار شوي دي.
   د برېښنا شرکت مسئولین وايي: هره میاشت ۲۵ میلیونه ډالر تاجکستان، ازبکستان او ایران ته د برېښنا په بدل کې ورکول کیږي، چې د ازبکستان برخه پکې تر ټولو زیاته ده.
   باید وویل شي، چې افغانستن کې ۸۰ سلنه برېښنا له وارداتي لارو پیدا کیږي او ۲۰ سلنه ”۳۰۰ مېګاواټه” یې د هېواد دننه تولیدیږي، چې د افغانستان د ټول نفوس ۳۵ سلنه وګړي لاسرسی ورته لري.
 
دوشنبه ۱ ثور ۱۳۹۹ ساعت ۱۲:۲۸
د مطلب کود: 208225 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *