د سوېلي او منځنۍ اسیا لپاره د امریکا د بهرنیو چارو وزارت مرستیالې الیس وېلز افغانستان کې پر زېربناوو وروستي بریدونه غندلي. د نوموړې دا څرګندونې له هغه وروسته دي چې د یکشنبې په ورځ د کابل شمال کې د برېښنا پایه ونړول شوه.

افغان چارواکي وایي، په لنډمهالي ډول یې د برېښنا تارونه نښلولي، خو پوره نښلول به یې تر څلور پنځو ورځو وخت وغواړي.
د برېښنا شرکت په خبره،د دغې پایې چپه کېدو سره په کابل، ننګرهار، لغمان، وردګ، غزني، لوګر، پکتیا او خوست کې زرګونه کورنۍ له برېښنا بې برخې شوې دي.