اروپايي اتحادیه: که سیاسي اختلافات حل نشي، په مرستو منفي اغېز کوي

دوی ویلي، سیاسي اختلافات باید پای ته ورسېږي او ملي اړتیاوې باید تر هر څه وړاندې مطرح شي او که داسې ونشي، د افغانستان د خلګو غوره راتلونکې به په خطر کې ولوېږي.
اعلامیه کې زیاته شوې « د افغانستان د عمده ملاتړو او ملګرو په حیث موږ له عبدالله عبدالله سره د خبرو په مهال دا اندېښنه څرګنده کړه، چې که د سیاسي اختلافاتو په حل کې پرمختګ ونه لیدل شي، دا به په امنیتي او رغنیزه برخه کې په کېدونکو مرستو ناوړه اغېز ولري.»
اعلامیه کې د اروپایي اتحاديې استازو عبدالله عبدالله د حساب وړ شخص بللی، چې ددوی په خبره، کولای شي له ډيموکراټیکو لارو څخه په کار اخستلو روان بحران حل کړي او ټينګار شوی، چې اوس هغه وخت رارسېدلی دی، چې خپلې ټولې هڅې له کرونا سره په مبارزې او د حالت د کابو کولو په موخه د مذاکراتو په پیل ولګول شي.