خوښ ديک ۰

میدان وردګ: دولتي ځواکونو یو ملکي روغتون په توپونو ویشتلی

د میدان وردګ ولایت چک ولسوالۍ اوسېدونکي شکایت کوي، چې دولتي عسکرو تیره ورځ ناوخته ددې ولسوالۍ د شیرخانه روغتون په ډیسي توپونو ویشتلی او ویجاړ کړی دی. ځايي خلک وايي، دا یوازې پرون ورځ نه وه، چې کلي او کورونه یې د ډيسي توپونو او هاوانونو تر اور لاندې ونیول شول، بلکې په سیمه کې میشت دولتي ځواکونه زیاتره وخت د ماسپښین نه وروسته ددوی په کورونو او کروندو د توپونو ډزې کوي، چې د خلکو ژوند یې له ستونزو سره مخ کړی دی.

که څه هم د چک ولسوالۍ په ویجاړ شوي روغتون کې چاته ځاني زیان اووښتی نه دی؛ خو له چک سره په ګاونډ کې پرتې سیدآباد ولسوالۍ کې بیا د دولتي ځواکونو په توپچي ډزو کې د ۳ میرمنو په ګډون ۴ تنو ولسي خلکو ته مرګ ژوبله اووښتې ده.
د سیدآباد ولسوالۍ په سلطانخیلو کې د احمدي او شیرین په نومونو کسانو کورونو باندې تیره ورځ د دولتي عسکرو لخوا توغول شوې د هاوان مرمۍ پرېوتلي، چې په ترڅ کې یې ۲ دواړه کورونه زیانمن شوي، یوه ښځه وژل شوې او ۲ نورې ټپيانې دي.
ددې ترڅنګ په آسیا زرک خیلو کلي کې هم پر یوه ملکي کور د ډیسي توپ مرمۍ لګېدو له امله کور نړېدلی او ددغې کورنۍ یو ځوان زوی په کې وژل شوی دی.
په میدان وردګو کې دولتي عسکر په داسې مهال ملکي روغتون او د خلکو کورونه په ډیسي توپونو ویجاړوي، چې په هېواد کې له کرونا وبا سره د مبارزې او رمضان المبارک میاشتې په احترام په ملي، سیمه ییزه او حتی نړیواله کچه د اورکم او اوربند غوښتنې مخ په زیاتېدو دي، کومې چې تراوسه نه دي منل شوي.
دا په داسې حال کې ده، چې د امریکا او طالبانو ترمنځ لاسلیک شوې توافقنامه کې طالبان له لویو بریدونو او امریکا او متحدین یې له هوايي بریدونو او درنو وسلو له استعمال څخه منع کوي؛ خو داسې ښکاري چې امریکایان هم وخت ناوخته هوايي بریدونه کوي او دولتي ځواکونو بیا د ډیسي او توپچي بریدونو په کولو سره د ولسي خلکو ژوند سخت تریخ کړی دی.
 
چهارشنبه ۲۴ ثور ۱۳۹۹ ساعت ۱۲:۱۷
د مطلب کود: 209806 په کلپبورډ کې د خبر متن کاپی
ستاسو نوم

ستاسو دبرېښنا ليک پته
ستاسو نظر *