د افغانستان د عامې روغتیا وزارت وايي چې په تېره یوه شپه او ورځ کې ۵۴۶ تنه په کروناویروس اخته شوي چې ورسره په دغه هېواد کې د کویډ۱۹ ناروغانو شمېر ۲۸زره او ۴۲۴ ته لوړ شوی دی.

د دغه وزارت د معلوماتو په اساس په تېرو ۲۴ ساعتونو کې ۲۱ تنه له دغې ناروغۍ مړه شوي او ۳۳۰ نور بېرته روغ شوي دي.
د ورغتیا وزارت د رسمي شمېرو په اساس په افغانستان کې د کروناویروس د خپرېدو له پیل راهیسې تر اوسه ۵۶۹ تنه دغې ناروغۍ مړه کړي او نږدې ۸۳۰۰ تنه بېرته ترې روغ شوي دي.
د روغتیا وزارت معلومات ښيي چې د افغانستان به لابراتوارونو کې تراوسه د کروناویروس ۶۳زره او ۹۵۱ معاینې شوي چې له دې شمېرې ۲۸زره او ۴۲۴ یې مثبتې تشخیص شوي دي.
خو په دغه هېواد کې د تشخیصه کیټونو د کموالي او په معایناتو کې د ځنډ له امله زیات شمیر افغانان چې په دې ناروغۍ اخته شوي د معاینې لپاره لابراتوارونو ته نه ځي او په خپلو کورونو کې تر درملنې لاندې دي.
ځینې یې په ټولنیزو رسنیو کې د کروناویروس علایمو ته په کتو خپله ناروغي تائیدوي او یو شمیر نور له دغې ناورغۍ څخه د خپلو عزیزانو د مړینې خبر ورکوي.
دې مسلې ته پاملرنې ښايي په افغانستان کې د کروناویروس له امله د مړه شویو او په دې ویروس د اخته شویو کسانو شمېره له هغې پورته وي چې د افغانستان د عامې روغتیا وزارت یې په رسمي ډول له رسنیو سره شریکوي.
دغه وژونکی ویروس د لومړي ځل لپاره د ۲۰۱۹ په ډیسمبر کې د چین د هوبي ایالتت په ووهان ښار کې خپور شو او په چټکۍ سره د نړۍ ۱۸۸ هېوادونو ته ورسېد.
د امریکا د جانس هاپکینز پوهنتون معلومات ښيي چې د شنبې تر ورځې جون ۲۰ (غبرګولي ۳۱) په نړۍ کې نږدې اته میلیونه او ۶۶۷زره په کروناویروس اخته شوي چې له دې شمېرې څه باندې ۴۶۰زره تنه مړه شوي.