غزني کې د ملي پوځ يو شمېر سرتېري د والي وحيدالله کليمزي او د دفاع وزارت د استازو لخوا وستايل شول. مسؤلين وايي، سرتېرو په دې وروستيو کې د امنيت ټينګښت، د بريدونو مخنيوي، د جنايي پېښو په کمېدو او په ټوله کې د ټيکاو په راويستلو کې بې سارې هڅې کړي دي.
د غزني والي وحیدالله(کلیمزي) جوړي شوي ناستي ته خبرو کي د امنیتي ځواکونو د شهیدانو روح ته چي له هیواد او ولس څخه د دفاع په لاره کي شهیدان شوي دعا وکړه، د امنیت د ټينګښت او د دښمن په ځپلو کي يي د امنیتي ځواکونو کړني او سرښندني وستایلي. د ملي دفاع وزارت د ځانګړو عملیاتونو د قول اردو قومندان جنرال فرید احمد(احمدي) د افغان اتلو سرتیرو سرښندني وستایلي. د هغه په خبره د وسله والو طالبانو لیکي د پخوا په پرتله دیري کمزوري شوي، د وسله والو په لیکو کي بي نظمۍ او بیلوالی راغلی او روحیه يي ځپل شوي ده. د نوموړي په وینا وسله وال له جدي ماتي سره مخ دي او سوله يي د ژغورني یواځینۍ لاره ده. د غونډي په پای کي لسګونه تنه افسران، بریدملان او سرتیري په ستاینلیکونو وستایل شول.