د سپين‌بولدک-چمن لار نن د يوې ورځې لپاره د خلکو پرمخ پرانيستل شوې

دا په داسې حال کې ده چې ياده لاره د خلکو د تګ راتګ پر مخ د اوږدې مودې لپاره د کرونا وايروس له کبله د پاکستان له لوري تړلې وه او يوازې د سوداګرۍ او ترانزيت لپاره په وروستيو کې پرانیستل شوې وه.
تر لوی اختر يوه ورځ وړاندې د دې دروازې پورې خواته لومړی د افغان کډوالو او پاکستاني ملېشو تر منځ او وروسته د افغان ځواکونو او پاکستاني ملېشو تر منځ نښتې هم رامنځته شوې چې اصلي سبب يې د خلکو پر مخ د دغه لارې تړلي پاتې کېدل و.
تر اختر يوه ورځ وړاندې په زرګونو افغانانو غوښتل د اختر لپاره له دې لارې راتېر شي، خو پاکستاني ملېشو اجازه نه ورکوله او وروسته د خلکو اعتراض پيل شو، نښتې رامنځته شوې او دواړو خواوو ته مرګ ژوبله هم واوښته.