د لبنان د عامې روغتیا وزارت وايي، د دغه هېواد په پلازمېنه بيروت کې د وړمې ورځې چاودنه کې د وژل شوو شمېر ۱۳۵ او د ټپيانو ۵۰۰۰ ته لوړ شوی او د مالي زيانونو کچه بیا ۱۵ مېليارد ډالرو ته پورته شوه.

دغه چاودنه د بيروت په بندر کې د چاودېدونکو توکو په يوه انبار کې رامنځته شوه.

چارواکي وايي، د امونیم نايتريت کيمياوي توکي په ناخوندي ډول په يوه ډيپو کې ساتل کېدل.

راپورونه وايي، دغه توکي څو کاله وړاندې له يوې کښتۍ نيول شوي وو.

د لبنان حکومتي چارواکو د دې بندر مسولين پرون پر خپلو کورونو کې نظربند کړل.