د کورنیو چارو وزارت ویاند طارق آرین د دوشنبې ورځ وویل چې مل پاسوال جمعه ګل همت د کابل امنیه قومندان ټاکل شوی دی. نوموړی تر دې مخکې د هلمند او کونړ ولایتونو امنیه قومندان او د دفاع د سرحدي ځواکونو عمومي قومندان په صفت دندې ترسره کړې دي. په داسې حال چې یوه اونۍ وړاندې د بادغیس والي په توګه یاد ولایت ته معرفي شوی و چې د خلکو له سخت غبرګون سره مخ شو او نوموړي ته یې اجازه ورنکړه چې د دوی د والي په صفت دنده مخ ته یوسي. جمعه ګل همت داسې مهال د کابل د نوي امنیه قوماندان په صفت ټاکل کېږي چې تېره ورځ ددې ولایت پخوانی امنیه قومندان امان الله واحدي د ورستیو امنیتي پېښو پر بنیاد له دندې ګوښه کړل شو.