عمران په
واشنګټن پوسټ ورځپاڼه کې په خپره کړې مقاله کې ویلي، که څه هم په دې برخه کې به ستونزې وي، خو نوموړي زیاته کړې چې بریالیتوب یې د ټولو اړخونو زغم او حوصل ته اړتیا لري.
هغه ویلي:"په افغانستان کې د سولې په اړه خبرې کېدایشي له ستونزو سره مخ وي، د ټولو اړخونو صبر او حوصلې ته اړتیا لري، کېدایشي پرمختګ وکړي، خو ستونزې به وي،کېدایشي کله ناکله به ګډوډي وي، ځکه چې افغانان د خپل راتلونکي لپاره کار کوي."
نوموړي زیاته کړې چې له خارجي زور څخه په استفادې په افغانستان کې سوله او ثبات نشي راتلی، بلکې په خبره یې یوازې د افغانانو په مالکیت او مشرۍ د روغې جوړې له لارې راتلی شي.
هغه د سولې خبرو په جریان کې په افغانستان کې د ښکېلو اړخونو ترمنځ د تاوتریخوالي پر کمېدو هم ټينګار کړی دی.
دا په داسې حال کې چې ولسمشر غني او عمران خان د تلې پر څلورمه د ټیلیفون له لارې د دواړو هيوادونو د اړيکو، د سولې د بهیر او په افغانستان کې د اوربند په اړه خبرې کړي.
ارګ ویلي چې ښاغلي غني په دغو خبرو کې په اوربند ټينګار کړی او د پاکستان لومړي وزير عمران خان ته يې افغانستان ته د رسمي سفر بلنه ورکړې.
په بیان کې د ښاغلي خان له قوله راغلي:"موږ په افغانستان کې د اوربند ټينګښت بشپړ ملاتړ کوو."
د پاکستان صدراعظم د سپټمبر پر ۱۲مه په دوحه کې د بین الافغاني مذاکراتو پيلېدل د افغانستان، سیمې او پاکستان لپاره هیله بخښوونکي بللي دي.
خان ویلي چې د افغانستان کړکېچ تر افغانانو وروسته د پاکستان پر اقتصادي وضعیت هم منفي اغېز کړی دی.هغه په پاکستان کې د مخدره موادو او وسلو تور بازر پراخېدل د افغان جګړې د اغېزو له امله بللی دی.
عمران خان یو ځل بیا زیاته کړې، تر څو چې افغانستان کې سولې ټینګه نشي په پاکستان کې هم سوله نشي راتلی.
سرچينه : د صدای افغان خبری آژانس(آوا)