پکتیا کې امنیتي سرچینې وایي، د بهرنیو ځواکونو هوایي برید کې د طالبانو دوو مهمو قوماندانو په ګډون ۱۲ وسله وال وژل شوي او درې نور ټپيان شوي دي.

د پکتیا ولایت سرپرست امنیې قومندان سمنوال لطف الله کامران اطلاعات روز سره په خبرو کې وویل، تېره شپه لومړی وسله وال طالبانو د مرکز ګردېز اړوند د «بنوزیو» پر پوسته برید وکړ، وروسته بیا بهرنیو ځواکونو هم په وسلوالو طالبانو هوایي برید وکړ.

په یاد برید کې د«زرقاوي» او «هلال» په نوم د طالبانو دوو مهمو قومندانانو په ګډون ۱۲ وسلوال طالبان ووژل شول او درې نور ټپيان شوي دي.
د پکتیا چارسمبالي امنیي قوماندان په وینا په دې برید کې افغان ځواکونو ته کومه مرګ-ژوبله نه ده اووښتې.

وسله والو طالبانو لا تر اوسه په دې اړه څه نه دي ويلي.