د باميانو يو شمېر اوسېدونکي په دغه ولايت کې د خوراکي توکو د بيو له لوړېدو شکايت کوي او وايي، چې په هېواد کې د روان وضعيت او د بې وزلۍ او بېکارۍ د ډېرېدو له امله خلک د اومو توکو د پېرلو توان نه لري.

آوا - بامیان: د بامیان ولایت خلک وايي چې په وروستیو میاشتو کې په ټولو سیمو کې د خوراکي توکو بیې لوړې شوې او د اړتیا وړ لومړني خوراکي توکي نه شي ترلاسه کولای.

په بامیانو کې د خوراکي توکو عمده پلورونکي وايي، په وروستیو کلونو کې د اومو موادو بیه دوه برابره لوړه شوې ده.

د باميانو يو پلورونکي حبيب الله وويل: "يو شمېر ښاريان سودا اخلي، خو ډېر بې وزله خلک يې د اخيستلو توان نه لري.

د بامیان ښاروال هم له آوا سره په مرکه کې د خوراکي توکو د بیو لوړوالی تایید کړ او ویې ویل چې په بازار کې بشپړ کنټرول لري.

د بامیان ښاروالۍ له لوري په تازه خپاره شوي نرخ نوملړ کې د یوې بوجۍ اوړو بیه ۲۶۵۰ افغانۍ، ۱۵۰ ګرامه ډوډۍ په ۱۰ افغانۍ، ۵ لیتره غوړي په ۹۵۰ افغانۍ او داسې نور ټاکل شوي دي.

په بامیان کې د اسلامي امارت ښاروال راز محمد افکار آوا ته وویل، ټول د خوراکي توکو پلورنځي مکلف دي چې د دې بیې له لیست سره سم عمل وکړي، که نه نو د قانون له مخې به ورسره چلند وشي.

دا په داسې حال کې ده، چې شاوخوا ١٤ مياشتې مخکې د ښاروالۍ د ادارې له خوا د نرخ په نوملړ کې د يوه بورۍ اوړو بيه ١٩٥٠ افغانۍ، پنځه لېتره غوړي ٦٥٠ افغانۍ او د يوې ډوډۍ بيه له ١٨٠ څخه تر ٢٠٠ ګرامو پورې په ١٠ افغانۍ ټاکل شوې وه.

د بامیان ولایت یو شمېر ټولنیز فعالان او فعالان وايي، که د خوراکي توکو بیې راټيټې نه شي، یو شمېر کورنۍ به له سختې لوږې سره مخ شي.

دا یوازې د بامیان اوسېدونکي نه دي چې د خوراکي توکو د لوړ قیمت له امله زیانمن شوي؛ په هېواد کې له وروستیو تغیراتو او پر اوکراین د روسیې له پوځي یرغل وروسته په ټول هېواد کې د خوراکي توکو بیې لوړې شوې دي.