له تېرو دوو ورځو راهیسې د افغانستان په ګڼو سیمو کې اورښتونه ډیر شوي. په همدې حال کې د سالنګ د لويې لارې مسوولين وايي چې د دغو دوو ورځو په اوږدو کې د واورې د ورښت له امله پر دغې لويې لارې د واورې کچه پنځه سانتي مترو ته رسېدلې ده.

آوا - کابل: نسبتاً درانه اورښتونه چې دوه ورځې وړاندې د هېواد په ۲۴ ولایتونو کې پیل شوې، په یو شمېر سیمو کې د سیلابونو او ځانی زیانونو لامل شوی دی.
 
خو د افغانستان په ځینو سیمو لکه بامیان او سالنګ کې واوره ورېدلې او هوا ډېره سړه شوې ده.
 
د باميانو ولايت اوسېدونکي وايي، چې د واورو له امله يې ښايي فصلونه زيانمن شي.
 
ویل کېږي چې په تېرو دوو ورځو کې د هېواد په پلازمېنه کې هم نسبتاً لږ بارانونه شوي او د هوا تودوخه له ۳۰ څخه تر ۱۵ درجو پورې راټیټه شوې ده.