کندهار د افغانستان یو له تودو ولایتونو څخه دی، چې وچکالي او د دوبي په ګرمو ورځو کې د برېښنا نشتوالی په دغه ښار کې ژوند له ستونزو سره مخ کړي. له څو کلونو راهیسې د کندهار د توپخانې په بازار کې جوړونکي د ارزانه وسایلو په کارولو سره کولرونه تولیدوي چې په مستقیم ډول د سولر پینلونو سره نښلول کیدای شي.

آوا - کندهار: د افغانستان پراخه ځمکه د اقلیم د جغرافيې له نظره مختلفې سیمې لري. زموږ په هېواد کې لوړ غرونه او ټيټې دښتې د دې لامل شوي چې ځينې ولايتونه سړه او نور ډېر ګرم شي. کندهار د افغانستان یو له تودو ولایتونو څخه دی، چې د دوبی په ګرمو ورځو کې وچکالي او د برېښنا پرې کېدو په دغه ښار کې ژوند له ستونزو سره مخ کړی دی.
 
خو اوس د څو کلونو راهيسي د کندهار د توپخانې مارکيټ د لومړنيو وسايلو په کارولو سره کولرونه توليدوي چي په مستقيم ډول د سولر له تختو سره وصل وي او په کوچنيو ځايونو کي د ښار د سختي ګرمۍ سره مقابله وکړي.
 
نثار احمد ګلستانی په کندهار کې د کولران د يوې فابريکې مشر چې له تېرو شلو کلونو راهيسې په کندهار کې د کولران په جوړولو کار کوي، آوا ته وويل: د دغو کولرانو خام مواد له ايران او پاکستان څخه راځي او بيا دلته د بشپړ کولر په جوړولو کې ترې کار اخيستل کېږي.
 
هغه زیاته کړه: کندهار د افغانستان د نورو ولایتونو په پرتله ګرم اقلیم لري، خلک یې له اقتصادي پلوه کمزوري دي او د دې ولایت د اوسېدونکو لویه هیله برېښنا ده، چې تر اوسه نه ده پوره شوې، نو د سولري کولرونو د جوړولو چارې لا هم روانې دي.
 
د هغه په ​​وينا، هغه کولرونه چې دوى يې جوړوي په کمه برېښنا يا ډي سي برېښنا سره ښه کار کوي او د يوې کوټې لپاره کافي دي.
 
د کندهار اوسېدونکی موسى احمدي وايي: په کندهار کې د جوړو شويو کولرونو يوه ځانګړنه دا ده چې هر څوک کولاى شي دا کولر په ټيټه بيه واخلي او حتی په کندهار کې يو کم عايد لرونکى کولر په دوه زره افغانۍ اخيستلاى شي.
 
هغه زیاتوي چې دغه کولران کم مصرفه دي او د دغو کولرونو پرزې په بازار کې په ټیټه بیه خلکو ته وړاندې کېږي.