خبري سرچینې وايي، په کابل کې د پاکستاني پلاوي او طالبانو ترمنځ د خبرو وروستی پړاو له کوم پام وړ پرمختګ پرته پای ته ورسېد.

آوا - مانیتورینګ: محمد علي سیف؛ د خیبر پښتونخوا ایالت د اعلی وزیر سلاکار د دوشنبې په ورځ د نورو جزیاتو له ورکولو پرته آزادي راډيو ته وویل، چې دغه خبرې اترې په ډېره ښه فضا کې ترسره شوې او دواړو لورو خپل نظریات او وړاندیزونه شریک کړل.
 
هغه زیاته کړه، دا خبرې باید ټوله ورځ تر پوښښ لاندې راشی، خو درې ورځې یې دوام وکړ او له خیبر پښتونخوا ایالت سره د قبایلي سیمو د الحاق د لغوه کولو لپاره د پاکستاني طالبانو غوښتنه د بحث یو له مهمو مسایلو څخه و.
 
"تر ټولو مهمه مسئله چې ډیر بحث شوی د فاټا (د وفاق تر انتظام لاندې قبایلي سیمو) د حیثیت په اړه د دوی (پاکستاني طالبانو) غوښتنه وه چې دوی وايي د دې سیمې مربوط دې بیرته واخیستل شي او په دې اړه زموږ نظرونه موږ سره شریکوي.
 
ښاغلي سیف زیاته کړه، چې هېواد ته د پاکستاني طالبانو د بېرته ستنېدو پر موضوع، په دې تړاو سیاسي، ټولنیزو او اقتصادي مسایلو هم خبرې وشوې.
 
د قبایلي سیمې فاټا څلور کاله وړاندې د پاکستان د پارلمان د پرېکړې له مخې له خیبر پښتونخوا ایالت سره یوځای شوه.
 
دا په تیره یوه اونۍ کې دوهم پاکستانی پلاوی دی چې له پاکستاني طالبانو سره د خبرو لپاره کابل ته سفر کوي.
 
یو بل پاکستانی پلاوی چې دیني عالمان په کې شامل و، د شنبې په ورځ له پاکستان څخه کابل ته راستون شو.
 
که څه هم دا مذاکرات د اسلامي امارت په منځګړیتوب ترسره کیږي، خو په دې اړه یې له رسنیو سره ډېر کم معلومات شریک کړل.