د بلخ د کرنې ریاست چارواکي په دغه ولایت کې د انځر په حاصلاتو کې ۲۰ سلنه زیاتوالی ښيي او وايي چې سږ کال به ۳۰۰ ټنه انځر حاصل کړي.

آوا - مزار شریف: محمد حسین عظیمی؛ د بلخ د کرنې رياست د کرنې د پراختيا رييس آوا ته وويل: په بلخ ولايت کې ۷۰ هکتاره ځمکه د انځر تر کښت لاندې ده چې سږ کال يې په حاصلاتو کې ۲۰ سلنه زياتوالی راغلی دی.
 
د هغه په ​​وينا، سږ کال به له بلخ څخه ۳۰۰ ټنه انځر حاصل شي. په داسې حال کې چې تېر کال په دغه ولایت کې د انځر حاصلات ۲۵۰ ټنه وو.
 
عظيمي زياته کړه، چې د بلخ انځر تر ډېره په خلم، دهدادي، نهرشاهي او بلخ ولسواليو کې کرل کېږي.
 
بلخ د افغانستان په شمال کې یوازینی ولایت دی چې انځر په کې ښه وده کوي. ویل کیږي چې د هر انځر د میوې حاصلات چې عمر یې له څلورو کلونو څخه زیات وي د میوو په موسم کې چې د اسد له میاشتې څخه پیل کیږي او د میزان میاشتې تر پایه دوام کوي ۵۰ کیلو ته رسیږي.
 
خو د بلخ ولايت يو شمېر بڼوال وايي، چې دغه مېوه د بوټو د ځانګړتياوو له امله ښه بازار لري او ډېر پېرېدونکي لري. دوی ټینګار کوي چې د انځر د ونو حاصلات د تېرو کلونو په پرتله ډېر شوي دي.