ایران د کابل د چاودنې له قربانیانو سره د مرستې لپاره چمتووالی اعلان کړ

 

د افغانستان لپاره د ایران ځانګړي استازي د اسلامي امارت د عامې روغتیا وزارت له چارواکو سره په ټیلیفوني اړیکه کې د کابل د نننۍ چاودنې له قربانیانو سره د مرستې لپاره خپل چمتووالی اعلان کړ.

 

تر دې مخکې په افغانستان کې د ایران سفارت د کابل په لوېدیځ کې د کاج پر ښوونیز مرکز ترهګریز برید غندلی او هغه یې یو ترهګریز برید بللی و.

 

په کابل کې د ایران سفارت په یوه ټویټ کې لیکلي دي: د ایران د اسلامي جمهوریت سفارت د کابل په لویدیځ کې هغه وحشیانه او تروریستي پیښه په کلکه غندي چې په پایله کې یې یو شمیر بې ګناه خلک شهیدان او ټپیان شول.
 

نافع ټکور; د اسلامي امارت د کورنیو چارو وزارت ویاند ویلي چې نن سهار د کابل په لویدیځ کې د کاج په ښوونیز مرکز برید کې ۱۹ تنه شهیدان او ۲۷ نور ټپیان شوي دي.

 

خو يو شمېر عيني شاهدان بيا وايي، چې د دې چاودنې مرګ ژوبله له هغه څه ډېره ده، چې په رسمي توګه يې اعلان کړى دى.

 

چاودنه نن سهار هغه مهال رامنځته شوه، چې په دغه ښوونیز مرکز کې د کانکور ازموینه روانه وه.