افغانستان باید منزوي نه شي

افغان غږ خبری آژانس - کابل: د افغانستان لپاره د اروپایی اتحادیې ځانګړی استازی توماس نیکولسن په یو لړ ټویټونو کې لیکلی، چې د اسلامی امارت په رسمیت پیژندل د میز پر سر نه دی، خو بیا هم دوی نه غواړی چې افغانستان منزوي شي.

 

  نیکولسن لیکلي چې له پاکستاني چارواکو سره په لیدنه کې د افغانستان د خلکو د ګټو لپاره د سیمې او نړیوالې ټولنې د همکاریو پر اړتیا خبرې وشوې.

 

هغه زیاته کړه چې له پاکستاني چارواکو سره یې په نادولتي موسسو کې د ښځو د کار کولو د منع کولو په اړه د کابل د مشرانو د تګلارو د پایلو، د ټول شموله حکومتولۍ پر اړتیا او د افغانانو د حقونو پر خوندیتوب ټینګار کړی دی.

 

توماس نیکولسن دا څرګندونې په داسې حال کې کړي، چې د افغانستان په چارو کې د امریکا ځانګړي استازي ټام ویست لا دمخه افغانستان ته سیمه ییز سفر پیل کړی دی.

 

بايد يادونه وشي چې نړيوالې ټولنې تل په هېواد کې د بشري حقونو په ځانګړي ډول د ښځو د حقونو پر رعايت ټينګار کړى، خو اسلامي امارت تل ويلي چې د ښځو او بشري حقونو ټولو هغو مسايلو ته ژمن دي چې له اسلامي احکامو سره په ټکر کې نه وي.