په هند کې د دوو اورګاډو د مرګوني ټکر په اړه د اسلامي امارت د بهرنیو چارو وزارت غبرګون

افغان غږ خبری آژانس - کابل: د اسلامي امارت د بهرنیو چارو وزارت نن شنبه (جوزا ۱۳) یوه اعلامیه خپره کړې او لیکلي یې دي: «د هند په اوډیشا ایالت کې د اورګاډي د پېښې له امله خپله خواشیني څرګندوي. چې سلګونه کسان په کې مړه او ټپیان شوي دي، هغه د قربانیانو له کورنیو او ټپیانو سره خپله خواخوږي شریکوي."
 
د رویټرز خبري آژانس د راپور له مخې، یوه حکومتي چارواکي د دوشنبې په ورځ د جوزا په ۱۳مه وویل چې د هند په اوډیشا ایالت کې د دوو مسافر وړونکو اورګاډو د ټکر په نتیجه کې لږ تر لږه ۲۳۳ تنه وژل شوي او ۹۰۰ نور ټپیان شوي دي چې د اورګاډي تر ټولو خونړۍ پېښه وه.
 
د ایالت اعلی وزیر پردیپ جینا په ټویټر کې اعلان وکړ چې احتمال لري د مړو شمیره لوړه شي.
 
هغه زیاته کړه چې د ۲۰۰ څخه ډیر امبولانسونه د ۱۰۰ اضافي ډاکټرانو سره د اوډیشا په بالاسور ولسوالۍ کې د پیښې ځای ته لیږل شوي دي.
 
ټکر د جمعې په ورځ په سیمه ایز وخت د ماښام شاوخوا ۷:۰۰ بجې هغه مهال رامینځته شو کله چې له بنګلور څخه لویدیځ بنګال ته د هاورې سوپر فاسټ ریل ګاډی د کولکتا څخه چینای ته د کورومندیل ایکسپریس اورګاډي سره ټکر شو.
 
خبري سرچینو لیکلي چې د سلګونو اور وژونکو، پولیس ځواکونو، ډاکټرانو او تلاشي سپیانو په مرسته د لټون او ژغورنې پراخ عملیات د شپې تر ناوخته دوام لري. د مړو د شمیر د زیاتیدو په اړه اندیښنې دوام لري.