هره میاشت سل زره پاسپورتونه هیوادوالو ته ویشل کیږي

افغان غږ خبری آژانس - کابل: د اسلامي امارت د مطبوعاتي دفتر څخه په خپره شوې خبرپاڼه کې راغلي چې د رئیس الوزرا اداري مرستیال مولوي عبدالسلام حنفي د پاسپورت ریاست له عمومي رئیس مولوي عبدالکریم حسیب سره وکتل. .
 
مولوي عبدالکریم حسیب لومړی د پاسپورټ عمومي ریاست د فعالیتونو او دندو په اړه راپور د رئیس الوزرا د اداري مرستیال دفتر ته وړاندې کړ.
 
هغه زیاته کړه، هره میاشت د دغه دفتر له لارې له سلو زرو څخه زیات پاسپورتونه مراجعینو ته وېشل کېږي او د پاسپورټونو د وېش د زیاتوالي لپاره هڅې روانې دي او دا هم وویل چې د مراجعینو د اسانتیا لپاره به لا زیاتې هڅې وکړي.
 
له بلې خوا مولوي عبدالسلام حنفي د پاسپورټ عمومي رياست له فعاليتونو، لاسته راوړنو او دندو څخه د خوښۍ په څرګندولو سره وويل، پاسپورټ د هر وګړي عادي حق دى او مسوولين يې بايد په ترلاسه کولو کې له هيڅ راز هڅو څخه ډډه ونه کړي.
 
هغه همدا راز زیاته کړه چې د افغانستان د اسلامي امارت مسوولین تل د هیواد په ټولو برخو کې د خلکو د ستونزو د پیژندلو او حل کولو په لټه کې دي.