د کابل والي شیخ محمد قاسم خالد د کابل د چارواکو او د کورنیو او بهرنیو مرستندویه ادارو ترمنځ د همغږۍ په غونډه کې د مرستو په وېش کې پر لا زیات روڼتیا او د سیمه ییزو ارګانونو او ادارو ترمنځ په همغږۍ ټینګار وکړ.

آوا - کابل: د کابل ولایت مقام مطبوعاتي دفتر نن (سه شنبه، سنبلي ۱۴مه) د یوې خبرپاڼې په خپرولو سره ویلي چې د کابل ولایت د چارواکو او د کورنیو او بهرنیو مرستندویه موسسو ترمنځ د همغږۍ غونډه جوړه شوه.
 
په دې غونډه کې د کابل ولایت د څوارلسو اداري واحدونو ولسوالانو او د ملاتړو بنسټونو استازو ګډون کړی و.
 
په دې کتنه کې د کابل والي شیخ محمد قاسم خالد وویل: اسلامي امارت د خلکو حقوقو ته درناوي ته ژمن دی او د خلکو د یووالي لپاره کار کوي.
 
نوموړي د مرستو په وېش کې پر لا شفافیت او د ادارو او سیمه ییزو ادارو ترمنځ په همغږۍ ټینګار وکړ او مرستندویه بنسټونو ته یې ډاډ ورکړ، چې د دوی خوندیتوب او امنیت په بشپړه توګه تامین شوی دی.
 
په همدې حال کې د پلازمېنې یو شمېر اوسېدونکي د بشري مرستو د وېش بهیر غیرعادلانه بولي او وايي چې د مرستو په وېش کې تعصب موجود دی.