آوا - کابل: د فواید عامې وزارت د یوې خبرپاڼې په خپرولو سره ویلي چې د دغو پروژو لګښت دوه میلیارده او ۱۷۱ میلیونه افغانۍ اټکل شوی چې په کې د لویو لارو، سړکونو، پلونو او پلچکونو جوړول او ترمیمول شامل دي.
 

په دې خبرپاڼه کې راغلي چې د دغو پروژو د جوړولو لګښت د وزارت له انکشافي او عادي بودجې څخه ورکول کېږي چې په تطبيق او پلې کېدو سره به يې د ١١٧١ کيلومتره سړکونو، ٢٦٤٠ مترو پلونو، ٧٦١ پلچکونو او داسي نور جوړ شي.
 

د فواید عامې وزارت د دغو پروژو د کار قرارداد له خصوصي سکتور سره کړی او تمه ده چې ډېری یې په روان کال کې بشپړې شي او هغه پروژې چې پلي کېدل یې ډېر وخت نیسي په راتلونکي کال کې به بشپړې شي.
 

د يادونې وړ ده، چې تېر کال د ټولګټو وزارت په ټول هېواد کې د څه باندې ٤٢١ ميليونه افغانيو په ارزښت ١٢٥ پروژې پلې کړې، چې تر لسو زرو ډېرو کسانو ته يې د کار زمينه برابره کړې وه.