د کانونو او پټرولیم وزارت ویاند وايي، د شبرغان-مزار شریف د ګازو د لېږدولو د نل لیکې د څه باندې سل کیلومتره غځولو کار ۶۰ سلنه بشپړ شوی دی.

آوا - کابل: د دغه وزارت ویاند همایون افغان له طلوع نیوز سره په خبرو کې ویلی چې دغه ۹۵.۵ کیلومتره پایپ لاین د ۶.۹ میلیونو افغانیو په پانګونه پیلیږی او زیاته یې کړه: په بشپړیدو سره د دې پروژې له لارې به هره ورځ ۱.۵ میلیونه متر مکعب ګاز مزارشریف ښار ته انتقال شي.

هغه وايي، د هېواد په کچه د ګازو سترې زېرمې د جوزجان ولايت په يتيم طاق، خواج ګوهردک او جرقدوق منابعو کې موقعيت لري او اوسمهال په قانوني ډول استخراج کېږي.

همایون افغان وايي: وروسته له دې چې دغه نل لیکه تر مزارشریف پورې وغځول شي، هره ورځ او شپه به د ۱.۵ میلیونه متر مکعب ګاز د انتقال ظرفیت ولري، چې د شبرغان ګاز به د مزارشریف ښار صنعتي پارکونو ته ورسوي. کورونه او یو شمیر فابریکو ته چې موږ ورسره تړونونه لرو لیږدول کیږي.

په ورته وخت کې د سوداګرۍ او پانګونې خونه په هېواد کې د معیاري درملنې د فابریکو پر جوړولو او د کانونو په ځانګړي ډول د ګازو د زېرمو پر پروسس ټینګار کوي.

د سوداګرۍ او پانګونې خونې د مدیره پلاوي غړي خانجان الکوزي طلوع نیوز ته وویل: دا د افغانستان د اقتصاد لپاره خورا اساسي او حیاتي ده او باید ورته توجه وشي، په ځانګړې توګه اسلامي امارت باید ورته پاملرنه وکړي. "زه فکر کوم چې موږ کافي زیرمې لرو."

په ورته وخت کې په هېواد کې د ګازو د زېرمو په شتون سره اوس مهال د اړتیا وړ ګاز د منځنۍ اسیا له هېوادونو او ایران څخه واردېږي.