د یوناما نوې ټاکل شوې مرستیاله جورجیت ګانیون کابل ته راغلې ده

افغان غږ خبری آژانس - کابل: په افغانستان کې د ملګرو ملتونو د مرستندویه پلاوي دفتر (یوناما) اعلان کړی چې جورجیت ګانیون کابل ته د یوناما د سیاسي مرستیالې په توګه خپل فعالیت پیلوي.

د یوناما د راپور له مخې مېرمن ګانیون د جمعې په ورځ کابل ته راورسېده، چې تر دې مخکې په افغانستان کې د ملګرو ملتونو د مرستندویه پلاوي د سیاسي مرستیالې په توګه ټاکل شوې وه.

نوموړی چې کاناډایي تبعه دی، له دې مخکې له ۲۰۱۰ څخه تر ۲۰۱۵ کلونو پورې په کابل کې د یوناما د بشري حقونو د مشر په توګه کار کړی دی.

د یادولو وړ ده چې نوموړي له ۲۰۲۱ کال راهیسې په لیبیا کې د ملګرو ملتونو د استازي د مرستیال او د بشري مرستو د همغږي کوونکي په توګه دنده ترسره کړې او له ۲۸ کلونو راهیسې یې د پخلاینې، بشري حقونو، بشري مرستو او په جګړه کې د پرمختګ په برخو کې کار کړی دی.