په کندوز ولایت کې د اوبو رسولو د یوې شبکې فعالیت

افغان غږ خبری آژانس - کابل: د کلیو د بیارغونې او پراختیا وزارت مطبوعاتي دفتر نن (شنبه، د حوت ۱۸مه) په یوه مطبوعاتي اعلامیه کې وویل چې د کندز ولایت د دشت ارچي ولسوالۍ د حاجي نعیم جان په کلي کې د اوبو رسولو د شبکې د جوړولو کار د هغه ولایت د کلیو د بیارغونې او پراختیا ریاست له لارې بشپړ او ګټې اخیستنې ته وسپارل شو.

په دې شبکه کې د (۱۰۰) مترو ژوروالي پورې د څاه کیندل، د (۴۰) مترو مکعب ظرفیت سره د کانکریټي ذخیره کولو ټانک جوړول، د (۱۶۱) اوبو نلونو نصبول، د (۳۶) لمریزو تختو نصبول، او (۱۱۵۰۰) متره چلونکي پایپونه شامل دي.

د دې شبکې د کار په جریان کې، لسګونو کارګرانو ته د کار فرصتونه برابر شول، او د هغې په بشپړیدو سره، په پورته ذکر شوي کلي کې (۳۶۳) کورنیو د څښاک پاکو اوبو ته لاسرسی وموند.

د کلیو د بیارغونې او پراختیا وزارت پخوا د هیواد په ځینو ولایتونو کې د اوبو رسولو شبکې جوړې کړې وې.