افغانستان له ایران څخه د ډاکټرانو د ظرفیت لوړولو او د طبي تجهیزاتو په برابرولو کې د همکارۍ غوښتنه کړي

افغان غږ خبری آژانس: د افغانستان د عامې روغتیا وزارت اعلان کړی چې د دې وزارت سرپرست مولوي نور جلال جلالي په کابل کې د ایران د اسلامي جمهوریت له سفیر علي رضا بیکدلي سره په لیدنه کې د روغتیا په برخه کې د دوه اړخیزو همکاریو پر پراختیا ټینګار کړی دی.

د وزارت د مطبوعاتي دفتر له خوا د خپرې شوې خبرپاڼې له مخې، دواړو خواوو په دې غونډه کې د روغتیايي کارکوونکو د ظرفیت لوړولو، د کیفیت لرونکو روغتیايي خدماتو وړاندې کولو او د افغانستان او ایران ترمنځ د ګډې همکارۍ په اړه بحث وکړ.

ښاغلي جلالي له ایران څخه وغوښتل چې د افغان ډاکټرانو د ظرفیت لوړولو او د باکیفیته درملو او طبي تجهیزاتو په برابرولو کې له افغانستان سره همکاري وکړي.

په ورته وخت کې، د ایران سفیر د افغانستان د روغتیا په برخه کې د دوامداره همکارۍ لپاره د خپل هیواد ژمنتیا په څرګندولو سره وویل چې ایران به ډیر ژر په کابل او بامیان ولایتونو کې د دوو روغتونونو جوړول بیا پیل کړي.

د یادونې وړ ده چې ایران له افغانستان سره په مختلفو برخو کې نږدې او جامع اړیکې لري، په ځانګړې توګه د روغتیا په برخه کې.