د اسلامي هېوادونو له خوا د افغان کډوالو سره ظالمانه چلند دردناک او د اندېښنې وړ دی

افغان غږ خبری آژانس - کابل: د کډوالو او راستنیدونکو چارو وزارت مطبوعاتي دفتر یوه اعلامیه خپره کړه چې پکې ویل شوي چې د دې وزارت سرپرست وزیر مولوي عبدالکبیر په پیښور کې د اسلامي امارت له جنرال قونسل حافظ محب الله سره د پاکستان څخه د افغان کډوالو د جبري ایستلو د نوې څپې په اړه خبرې کړې دي.

مولوي عبدالکبیر په غونډه کې وویل: "افغانان د خپل دین او ځمکې د ساتنې لپاره کډوالۍ ته اړ شول، خو د افغان کډوالو سره د ځینو اسلامي هیوادونو ظالمانه چلند دردناک او د اندیښنې وړ دی."

د کډوالو چارو سرپرست وزیر له افغان کډوالو سره نامناسب چلند د اسلامي او نړیوالو اصولو خلاف وباله او زیاته یې کړه چې اسلامي امارت د کډوالو د ستونزو د حل لپاره کافي سرچینې لري.

له بلې خوا، حافظ محب الله په دې غونډه کې په خیبر پښتونخوا او پاکستان کې د افغان کډوالو د ستونزو په اړه معلومات وړاندې کړل.

دا غونډه په داسې حال کې وشوه چې پاکستان له خپل هېواد څخه د افغان کډوالو د جبري ایستلو دوهم پړاو پیل کړ. پخوا، د پولیسو او پاکستاني خلکو لخوا د افغان کډوالو د ملکیتونو د لوټلو او وهلو راپورونه ورکړل شوي وو.