د سرې میاشتې ټولنې اعلان وکړ چې د کاپیسا ولایت په بیلابیلو برخو کې ۶۲۹۱ کسانو ته روغتیايي خدمات وړاندې شوي دي. په دې خدماتو کې د مختلفو ناروغیو د مخنیوي لپاره د واکسینونو ورکول، د حفظ الصحې په اړه مشوره ورکول، د نسایي او ولادي خدماتو وړاندې کول، او د خوارځواکۍ سره مخ ماشومانو ته ځانګړي خواړه چمتو کول شامل دي.
دخپریدو نیټه :چهارشنبه ۲۷ حمل ۱۴۰۴ ساعت ۱۷:۳۱
د مطلب کود : 312994
افغان غږ خبری آژانس - کابل: د سرې میاشتې ټولنې مطبوعاتي دفتر نن (چهارشنبه، د اپریل ۱۶مه) په خپله ویب پاڼه کې یوه مطبوعاتي اعلامیه خپره کړه چې پکې ویل شوي چې په تیره میاشت کې دوی د کاپیسا ولایت په بیلابیلو سیمو کې ۲۰۳۴ کسانو ته د معاینې وروسته اړین درمل ورکړي دي.
په خبرپاڼه کې دا هم ویل شوي چې ۳۲۰ ټپیانو ته مرهم تړل شوی، ۳۱۳ ښځې او ماشومان د مختلفو ناروغیو په وړاندې واکسین شوي، او ۲۷۸۰ کسانو ته اړین روغتیايي مشورې ورکړل شوې دي.
د مطبوعاتي اعلامیې له مخې، دوی ۴۵۵ میرمنو ته د نسایي او ولادي خدماتو، ۲۵۶ خوارځواکۍ ماشومانو ته ځانګړي خواړه او ۱۳۳ میرمنو ته د کورنۍ پلان جوړونې په اړه اړینې مشورې ورکړې دي.
د یادونې وړ ده چې په پروان ولایت کې، د سرې میاشتې ټولنې لخوا په تیره میاشت کې ۶۲۰۰ کسانو ته روغتیايي خدمات وړاندې شوي دي.
avapress.com/vdcdnx0soyt0fn6.lb2y.html
ډیری لیدل شوي
