ابو محمد الجولاني پاریس ته ورسید ترڅو له فرانسوي چارواکو سره وګوري

افغان غږ خبری آژانس: د تحریر الشام ډلې مشر او د سوریې د موقت حکومت مشر، احمد شریعه اروپا ته په خپل لومړي رسمي سفر کې د پاریس په چارلس ډی ګول هوايي ډګر ته ورسید. تمه کیږي چې هغه به د دې سفر په جریان کې د فرانسې د حکومتي چارواکو سره وګوري او په بیلابیلو مسلو به خبرې وکړي.

د سوریې ولسمشرۍ ماڼۍ د تیرې فبروري په میاشت کې اعلان وکړ چې د فرانسې ولسمشر ایمانویل مکرون ورته بلنه ورکړې چې هیواد ته سفر وکړي.

دا په داسې حال کې ده چې په فرانسه کې د علویانو یوې ټولنې مخکې اعلان کړی و چې د ابو محمد الجولاني او د هغه تر قوماندې لاندې د هیواد په قضايي سیسټم کې د یو شمیر عناصرو په وړاندې یې دعوی کړې ده.

د دې راپور له مخې، د پاریس لوی څارنوال اعلان وکړ چې هغه د الجولاني پر وړاندې په سوریه کې د نسل وژنې، قومي تصفیې او د انسانیت پر وړاندې د جرمونو په تور شکایت منلی دی.

ویل کیږي چې دا شکایت په ځانګړي ډول د دسمبر او مارچ ترمنځ د سوریې په ساحلي ښارونو کې د هیواد د لږکیو، په ځانګړې توګه د علویانو په وړاندې ترسره شوي جرمونه پوښي.

د یادونې وړ ده چې دا د ابو محمد الجولاني د واک له ترلاسه کولو وروسته اروپا ته لومړی سفر دی.