په هرات او فراه کې له ۲۰۰ ټنو څخه زیات بې کیفیته خواړه او درملو ته ور ورته شو

افغان غږ خبری آژانس - کابل: د عامې روغتیا وزارت مطبوعاتي دفتر نن (شنبه، د ثور ۲۰مه) یوه مطبوعاتي اعلامیه خپره کړه چې پکې ویل شوي چې د هرات ولایت د عامې روغتیا ریاست د خوړو او درملو ادارې لخوا د ترسره شوي لس میاشتني څارنې په موده کې، د دې ولایت د صنعتي ښارګوټي د خوړو او درملو مرکزونو څخه ۱۵۰ ټنه تاریخ تېر او بې کیفیته خواړه او درمل راټول شوي وو، چې د اړوندو ادارو د استازو په شتون کې له منځه یوړل شول.

 

له بلې خوا، د فراه ولایت د عامې روغتیا رئیس مولوي شیخ میر صدام د ۷۰ ټنه بې کیفیته خوړو او درملو د سوځولو پر مهال وویل: "د ولایت د عامې روغتیا ریاست د خوړو او درملو څانګې لخوا د ترسره شوي شپږو میاشتو څارنې د پایلو پر بنسټ، ۷۰ ټنه مختلف بې کیفیته او تاریخ تېر خواړه او درمل، چې ۳۰ ټنه یې درمل او ۴۰ ټنه نور یې خوراکي او غیر خوراکي توکي وو، د فراه له مرکزونو څخه راټول او له منځه یوړل شول."

 

د یادونې وړ ده چې په دې وروستیو کې د عامې روغتیا وزارت د خلکو د روغتیا او هوساینې د ساتنې په هدف د درملو او خوراکي توکو د پلورنځیو څارنه زیاته کړې ده.