په نورستان کې د پراختیایي پروژو څارنه؛ په منډول کې د ۵.۴ ملیون افغانیو څخه زیاتو په ارزښت پروژې پلي کول

افغان غږ خبری آژانس - کابل: د کلیو د بیارغونې او پراختیا وزارت مطبوعاتي دفتر د شنبې په ورځ یوه مطبوعاتي اعلامیه خپره کړه چې پکې ویل شوي چې د دې ادارې تخنیکي او انجینرۍ ټیم د نورستان ولایت په منډول ولسوالۍ کې د څو پراختیایي پروژو پلي کولو څارنه کړې ده.

 

په خبرپاڼه کې راغلي چې د دې پروژو ټولیز ارزښت له پنځه میلیونه او څلور سوه زره افغانیو څخه زیات دی او د کلیوالي سړکونو، کارېزونو او د اوبو لګولو کانالونو جوړول او ترمیم پکې شامل دي.

 

د کلیو د بیارغونې او پراختیا وزارت د معلوماتو له مخې، دا پروژې د ځایي ټولنې د اړتیاوو سره سم ډیزاین شوې وې او د پلي کولو په جریان کې یې سلګونه ځایي اوسیدونکي په کار ګمارل شوي وو. د دې پروژو اصلي هدف د چاپیریال ښه کول، د ترانسپورت اسانتیاوې برابرول او په لرې پرتو سیمو کې د اوبو سرچینو ته د ښه لاسرسي چمتو کول دي.

 

وزارت ټینګار کړی چې د دې پروژو له بشپړیدو وروسته به په منډول ولسوالۍ کې د زیربناوو ستونزې د پام وړ کمې شي.

 

په دې وروستیو اونیو کې، په نورستان کې د زیربنایي پروژو سرعت ګړندی شوی دی. تر دې مخکې، په منډول، دوآب او نورګرام ولسوالیو کې د ۲۱ ملیون افغانیو څخه زیاتو ارزښت ۱۵ نورې پروژې عملي شوې دي، چې پکې د اوبو برېښنا بندونه، د سړکونو جغل اچول، د پلیو لارو جوړول، او د اوبو لګولو د کانالونو جوړول شامل دي.

 

سربیره پردې، په منډول ولسوالۍ کې د نړیوال خوراکي پروګرام او د ملګرو ملتونو د ماشومانو د وجهي صندوق (یونیسف) په همکارۍ ۵۸ نورې پراختیایي پروژې پلي کیږي، چې نورستان ولایت به د ګاونډیو ولایتونو لکه پنجشیر او لغمان سره وصل کړي.

 

نورستان د هیواد یو له محرومو او غرنیو ولایتونو څخه دی چې د امنیتي، جغرافیایي ننګونو او کمزوري لاسرسي له امله د کلونو لپاره د زیربنایي پروژو څخه محروم و. اوس، د دې پروژو په پلي کولو سره، نه یوازې د سلګونو خلکو لپاره دندې برابرې شوې دي، بلکې د اوسیدونکو لپاره نوې هیلې هم رامینځته شوې دي. په اساسي زیربناوو لکه سړکونو، کانالونو او اوبو لګولو کې پانګونه به په دې برخو کې د ټولنیز او اقتصادي ودې بنسټ وي، په ځانګړې توګه که چیرې د دوامداره څارنې او عامه ګډون سره مل وي.