په کابل کې د زړه د ناروغیو د درملنې لپاره د ۱۰۰ بستریز روغتون د جوړولو لپاره لومړنۍ غونډه وشوه

افغان غږ خبری آژانس - کابل: د عامې روغتیا وزارت مطبوعاتي دفتر په یوه مطبوعاتي اعلامیه کې اعلان وکړ چې په کابل کې د زړه د ناروغیو د درملنې لپاره د ۱۰۰ بستریز روغتون د جوړولو د لومړني کار د پرمختګ لپاره یوه غونډه وشوه چې د آسیا پراختیایي بانک د استازو په ګډون ترسره شوه.

په مطبوعاتي اعلامیه کې راغلي چې دا غونډه د عامې روغتیا وزارت د روغتیا پالیسۍ او پراختیا مرستیال ډاکټر محمد حسن غیاثي په مشرۍ او د روغتیا پالیسۍ او پراختیا مرستیال وزیر په دفتر کې د وزارت د مرکزي رئیسانو او د آسیا پراختیایي بانک د استازو په شتون کې ترسره شوه.

د مطبوعاتي اعلامیې له مخې، د آسیا پراختیایي بانک به د کابل په چمن میر واعظ سیمه کې د زړه د ناروغیو د درملنې لپاره د ۱۰۰ بستریز روغتون جوړ کړي. د پروژې په جزئیاتو او لومړنیو اقداماتو بحث او تبادله وشوه.

سربیره پردې، د روغتیا د پالیسۍ او پراختیا مرستیال د پروژې د تخنیکي او اجرایوي چارو د پرمختګ په پروسه کې د آسیا پراختیایي بانک د استازو سره د همکارۍ لپاره ځانګړي تخنیکي کمیټې وټاکلې.

له بلې خوا، د آسیا پراختیایي بانک د پروژې د مدیریت متخصص منظور مرشد د عامې روغتیا وزارت د همکارۍ ستاینه وکړه، ژمنه یې وکړه چې د دوی کاري ټیم به د وزارت سره په همغږۍ کې د پروژې لومړني کار پیل کړي او په نږدې راتلونکي کې به د کاري پروسې د لا وضاحت لپاره یو ورکشاپ جوړ کړي.