د خواف-هرات ریل پټلۍ د څلورمې برخې د دوهم پړاو پرمختګ

افغان غږ خبری آژانس: د شرکت اجرایوي رییس انجنیر احمد شکیب سمیزي وویل چې د ریل پټلۍ د جوړولو کار اوس مهال د سمنټو فابریکې او حسن آباد کلي په دوو برخو کې هره ورځ او په دوامداره توګه دوام لري. د هغه په ​​وینا، تخنیکي ټیمونه، انجینران او کارګران د پرمختللو ماشینونو په کارولو سره کار کوي.

 

هغه ټینګار وکړ چې پروژه به په خپل وخت او د نړیوالو معیارونو سره سم بشپړه شي.

 

همدارنګه، د خواف-هرات ریل پټلۍ د پروژې مدیر انجنیر عبدالقاهر بکتاش وویل چې د پروژې د څلورمې برخې دوهم پړاو، چې ۴۷.۳ کیلومتره اوږدوالی او ۵۴ ملیون او ۶۰۰ زره ډالر لګښت لري، د ده سرخ سیمې څخه پیل او د هرات صنعتي ښار ته غځیدلی. هغه زیاته کړه چې د پروژې دا برخه به په ۲۴ میاشتو کې بشپړه شي.

 

د خواف-هرات د اورګاډي پټلۍ شاوخوا ۲۲۵ کیلومتره اوږده ده او افغانستان د ایران له لارې د اروپا د اورګاډي شبکې سره نښلوي. دا پروژه د هیواد د ترانسپورت او اقتصادي پراختیا په برخه کې یو له خورا مهمو زیربنایي پروژو څخه ګڼل کیږي.